الشاعر عطا السعيدي يخاطب العراق وهو على فراش المرض :
........................


أقره وجوه ناسك واعزل المعلول ... وبيَّن لي البريء من الذمته مشكولّة

ما أقبلها منك لا تكلي شلون ... انته العارفة التعرف المعلولة

صفره وجوههم مو مسحة الإيمان ... بس سم العقارب طارف ذيوله

ونعم بعض اللسن حدين وقت القول ... بترة وباشطة وبالجذب مصقولة

كلهم مو أهلنا الحادي والجمال ... لا من زولنا ولا حنه من زوله

ما اﮜلك مغفل لا ألف حاشاك ... ومعاذ الله هذا النعت ما كوله

بس خافن تظن دورة حسن بالعين ... مو دورة حسن لا والحسن حولة

يا صافي النوايا اختلط هذا وذاك ... صفي عيال بيتك واعزل الثولة

فرق صوت الخطيب وصيحة الدلال ... وفرق ما بين عدلة وبين معدولة

علامك يا وطن كثرت عليك الفوس ... هدماً والمعاول بيك معمولة

يا هو الوهمك بالغنم يسرح ذيب ... وليش انطيت صوفك غير غازوله

شجاك وبعت سرك وانته سرك بير ... ومغطى بطلاسم محد ينوله

ضاع القفل منك ولو نسيت الباب ... وخليت الحرامي يطبلك بطوله

بيتك خزنة الله وفاتح البيبان ... وغيرك كلشي ماكو وبوبه مقفوله

عدمن امنتني وناس تاكل ناس ... وأقطاب السياسة بغيري مشغولة

والحل والعقد بيدين أبو الجنيب ... عذرا يا وطن هم هاي معقولة ؟

يبو حجي المعدل صرت ترطن ليش ... يا راعي التراث المحد يطوله

استهوتك حضارة آل (توني بلير) ... لو غشتِك لهجة (بوش) معسولة

الخلل مو بالزَمل حادي الزَمل بيه ... عيب ما يعرف طبعنه وشتت زموله

بعد ما بيّه أعاتب يا وطن مليت ... آنه أنزفت كلشي وخلكك اشطوله

ثوبك من درع واردانك مشرعات ... واتمر عل العدو بثيابي مهدولة

يلعمرك سبعتالاف شنهو شبيك ... شو رديت تزحف هاي مقبولة ؟

وضعك ما يسرني وحالك أصعب حال ... لنته الشادهه ولا هيه محلولة

وضعت كلك بكبرك وآنه ضعت وياك ... راس المال ضاع وضاع محصوله

ويا راعي النفط راح النفط نهبوه ... والزئبق الأحمر كنسوا أحقوله

وعلى الأحوط وجوبا بعد ما كنسوه ... ركعتين بشرع (زلماي) صلوله

من باب العدالة وحفظ حق الناس ... سواءً تنقبل أو غير مقبولة

المهم باكوا وقسموا وانتهى الموضوع ... وكلمن شال حصته وترّس عدوله

وردينة انتـكاود بس أنا وعبود... نركض على المامش والعشا تولة

وسحقا يا نفط يا لعنة التاريخ ... يا نظرة حسد بعيون مكحولة

من يوم الطلعت بكاعنه الهليوم ... جنابك مشتعل والناس مشعولة

انته الغيرنه نعمة ورفاه وخير ... وعلى شعب العراق سيوف مسلولة

البدو شيّدوا دنيا وعمروا أوطان ... وانته بهالوطن هذا العبت جولة ؟؟

ليش بهالوطن هذا إلعبت جولة ؟؟؟

ليش بهالوطن هذا إلعبت جولة ؟؟؟

أكتب تعليقك هنا على المقال المنشور

(نرجو الامتناع عن كتابة العبارات الطائفية أو تلك المخلة بالأدب والذوق العام. سوف تحجب إدارة الموقع أية مشاركة لاتلتزم بالضوابط المنصوص عليها)